Die bome in die geskiedkundige Kerkplein in Pretoria het in die slag gebly, maar sal deur nuwe bome en ander aantreklikhede vervang word.

Foto’s van die afgekapte bome het Pretorianers vandeesweek verstom, maar die Tshwane-munisipaliteit sê dit is net ’n tydelike situasie en die plein sal nadat die projek afgehandel is mooier as ooit wees.

Solly Msimanga, DA-burgemeester van die Tshwane-metroraad, het met sy begrotingsrede in Mei dié projek aangekondig en inwoners gemaan om geduldig te wees omdat die projek sowat nege maande sal neem om af te handel.

Die Lalela-projek (die Zoeloe-woord vir luister) sal volgens Msimanga die eerste in sy soort wees en hopelik tot ’n meer inklusiewe gemeenskap bydra.

Die vorige ANC-beheerde burgemeesterskomitee het die projek vier jaar gelede goedgekeur, maar dit het nie ’n werklikheid geword nie.

Die nuwe administrasie het in Augustus verlede jaar beheer by die ANC oorgeneem en meen Kerkplein kort ’n “nuwe laag erfenis” waar ál die stad se inwoners tuis sal voel.

Daar is ’n paar nuwe jong boompies in twee rye aan die een kant van die plein aangeplant.

Saam met die bekende monument van oudpres. Paul Kruger en sy burgers wat sinoniem met die plein is, sal die nalatenskap en werk van struggle-staatmakers ook op die plein en by die Paleis van Justisie (oorkant die plein) as deel van die Lalela-spraakvryheidsmonument bewaar word.

’n Kunstenaarsvoorstellings van hoe die nuwe Kerkplein gaan lyk.

’n Rots wat van Robbeneiland kom waar politieke gevangenes in die apartheidsjare gedwonge arbeid verrig het, sal onder meer uitgestal word.

Die Tshwane-munisipaliteit hoop dit sal lede van die publiek, besoekers en beleggers na die omgewing van Kerkplein lok.

“Ons hoop dit sal ’n plek word waar die kleurvolle sy van vryheid van spraak geniet kan word en waar dit kan bydra tot die openbare diskoers in Suid-Afrika,” het Msimanga destyds gesê.
Daar sal daagliks vermaak op die plein wees wat hopelik toeriste en plaaslike inwoners sal lok en wat kan bydra tot die hernuwing van die middestad. Kunstenaars sal dag en nag hier gratis kan optree.

’n Opelugteater word ook in die vooruitsig gestel van waar kunstenaars se optredes wêreldwyd deur televisie of die internet uitgesaai kan word.

Konstruksiewerk aan die plein het op 23 Januarie begin, wat die tydelike sluiting van sommige strate genoodsaak het.

“Die plein sal geheel en al anders lyk met bome, waaronder ook jakarandas, opgeknapte grasperke en straatbankies wat by die moderne tuinuitleg sal aanpas,” het Lindela Mashigo, woordvoerder van die Tshwane-metro, in Januarie gesê.

“Die herontwerp sal tot die vernuwing van die middestad bydra.”

Deur: Netwerk 24


 

Leave a Reply