Dennis Haynes soos hy gelyk het toe hy vermis geraak het. Foto: Facebook

ʼn Nuwe wending het Dinsdag aan die lig gekom in die soektog na Dennis Haynes, die man van Bloemfontein wat 31 jaar gelede spoorloos verdwyn het.

Desireé Haynes, Dennis se suster, het gesê ʼn DNS-toets wat gedoen is om die DNS van haar ma en die man wat hulle vermoed het is haar broer te vergelyk, was negatief.

Haynes het vroeër vandeesmaand gesê dat ʼn eerste DNS-toets ʼn verband tussen haar en die man wat hulle geglo het Dennis is, getoon het. Volgens Haynes oorweeg sy nou om nog ʼn DNS-toets te laat doen, maar het die familie nog nie daaroor besluit nie.

Maroela Media het vroeër berig Dennis was 22 jaar oud toe hy in 1986 van Bloemfontein na Roodepoort vertrek het vir ʼn werksgeleentheid. Dennis het egter nooit teruggekeer nie en sy familie kon hom nie in die hande kry nie. Hy is as vermis aangemeld by die polisie, maar ʼn soektog na hom het niks opgelewer nie.

Nadat ʼn vriendin van Desireé ʼn Facebook-blad begin het om teen alle verwagting in te kyk of sy nie dalk vir Dennis kan opspoor nie, het ʼn vrou wat hulp aan haweloses in Pretoria gee Dennis se foto gesien en haar gekontak. Sy het gesê dat daar ʼn hawelose man in Pretoria is wat moontlik Dennis kan wees. Desireé is Pretoria toe om die man te ontmoet en hy het homself as Francois voorgestel, hoewel hy baie soos ʼn ouer weergawe van Dennis lyk wat 31 jaar gelede vermis geraak het.

Die Haynes-familie het sedertdien vir Francois ingeneem en help hom om weer op sy voete te kom. Foto: Facebook

Desireé het vroeër gesê die man ly aan erge geheueverlies en het ʼn vorm van breinskade opgedoen, vermoedelik nadat hy in ʼn tref-en-trap-ongeluk betrokke was. Die familie het hom sedertdien ingeneem en hom gehelp om weer op sy voete te kom. Desireé het verlede week aan Maroela Media gesê hoewel hy waarskynlik nooit weer sal werk nie, doen hy tans handewerk en maak onder meer sleutelhouers en armbandjies om homself besig te hou. Die familie wil hom ook by ʼn sentrum kry wat kan help om sy brein te stimuleer.

“Die reis is nog steeds nie verby nie. Ons sal nog steeds vir Francois help en hom die ondersteuning gee wat hy nodig het,” het Desireé Dinsdag gesê. “En ek sal beslis aanhou om na my broer te soek.”

Nadine Smal, Desireé se vriendin, het Dinsdagaand op die Facebook-groep oor Dennis geskryf Francois se glimlag het in hul harte gekruip en hulle gewys daar is altyd hoop ongeag hoe sleg omstandighede is. “Ons gaan nie die [Facebook-] blad sluit nie. Ons is jammer as daar mense is wat ons in ons soeke te na gekom of seergemaak het, maar ongelukkig is daar nie ‘n handleiding vir dié soort ding nie,” het sy gesê.

“Dennis Vivian Haynes, ek ken jou glad nie, ek weet nie hoe jou stem klink, hoe jy lyk of waarvan jy hou of nie hou nie, maar jy het diep spore in my gemoed kom trap. Ek het vir Desireé belowe ek sal nie ophou soek nie. Ek sal aanhou tot ek jou kry. Ter wille van jou en jou familie sal ons jou kry. Ek sal nie toelaat dat jy in ‘n oorvol stelsel bly wegraak en stof opgaar oor onbevoegde, onbelangstellende mense wat nie omgee nie. Ons sal jou kry en teruggee aan die mense wat al vir meer as dertig jaar elke aand gaan slaap met die wonder oor waar jy is en elke oggend opstaan met hoop dat jy gevind sal word.”

Leave a Reply