Pres. Donald Trump. Foto: AP Photo/Alex Brandon

’n Duidelik teësinnige president Donald Trump het verlede week wetgewing onderteken waarvolgens Amerika nuwe sanksies teen Rusland, Iran en Noord-Korea instel. Noord-Korea maak dalk sin, maar onverwagse nuwe sanksies teen Rusland en Iran in ’n tyd van reeds verswakkende verhoudinge met beide belangrike lande, maak eenvoudig nie sin nie.

Trump se waarskuwing nadat hy die wetgewing onderteken het, naamlik dat die verhouding tussen Amerika en Rusland ’n gevaarlike laagtepunt bereik het, is belangrik. Dit dui daarop dat Trump die erns van die krisis verstaan. Amerikaanse politici buite die Withuis is egter sodanig verenig in hul haat vir Rusland dat ’n veto deur Trump net tot groter verdeeldheid binne sy party en tot meer bespiegelinge oor Trump se verhouding met Rusland aanleiding sou gee.

Verlede jaar tydens die Amerikaanse verkiesingsveldtog was Trump se boodskap duidelik. Amerika moet hom uit konflik en oorloë wat nie sy belange dien nie, hou. Tweedens het hy herhaaldelik belowe dat, sou hy president word, sy administrasie daarop sal fokus om deur dialoog en onderhandeling die verhouding tussen Amerika en Rusland te verbeter. Tydens die Republikeinse Party se verkiesingskonvensie in Cleveland was dit duidelik dat die party se grondvlakstrukture hierdie boodskap ernstig opgeneem het. Partybeleid wat hiermee ooreenstem is aanvaar en die oorloglustige neokonserwatiewes wat in die Oekraïne teen Rusland wou gaan oorlog maak en nuwe konflik met Iran wou skep, het verloor. In November verlede jaar het die Amerikaanse kiesers gespreek en is Trump verkies.

Vandag, byna sewe maande ná Trump se inhuldiging lyk dit egter asof die oorloglustiges ten spyte van die wil van die Amerikaanse kiesers daarin slaag om hul agenda weer te laat geld. Die Amerikaanse regering het onlangs besluit om ten spyte van Trump se beloftes van verlede jaar wel wapentuig en ammunisie aan die regering in Kiev te voorsien. Verlede week het adjunkpresident Mike Pence in Georgië belowe om dié land deel van NAVO te maak en daardeur Amerikaanse militêre teenwoordigheid in nog ’n land tot op die grens met Rusland te neem. Dit alles spreek van Amerikaanse aggressie teenoor Rusland.

Ten spyte van Trump se beloftes van dialoog met Rusland, verkies die Amerikaanse kongres om eerder die Russe met nog sanksies te verras en kwaad te maak. Nie eens die Europeërs het van die beplande sanksies geweet nie en talle Europese leiers het met ontsteltenis daarop gereageer.

Verlede maand is ’n standbeeld van Roland Reagan en Mikhail Gorbatsjof in Moskou onthul. Talle hooggeplaaste Russiese politici het die geleentheid bygewoon. Ten spyte van talle uitnodigings het Amerika besluit om niemand na die geleentheid te stuur nie. President Gorbatsjof se reaksie op die onthulling van die standbeeld was dat die projek nie net na die verlede kyk nie, maar ook na hoe die toekoms tussen Rusland en Amerika moet lyk: een van reguit praat en gesonde dialoog.

Die teenwoordigheid van meer en meer Amerikaanse tenks in Oos-Europa, sanksies wat sonder goeie rede ingestel word en die voortdurende vernedering van Rusland se mense en leiers is nie in die belang van Amerika nie. Dit lyk ongelukkig of Trump se beleid jeens Rusland toenemend deur die neokonserwatiewe oorlogslustiges gekaap is. Dit kan net tot meer konflik en lewensverlies aanleiding gee.

  • Hierdie nuuskommentaar word deur Pretoria FM verskaf. Luister daagliks na Klankkoerant op Pretoria FM vir die jongste nuuskommentaar

Leave a Reply