’n Voornemede dief het sy rieme lelik styfgeloop toe hy Sondagoggend by Hartbeespoort deur  ’n boerboel tot in die swembad ingejaag  en daar aangehou is.

Huiseienaar Jody Gabrielson was besig om televisie te kyk in sy huis in Ou Wapad in Ifafi toe die skelm omstreek 01:00 oor sy muur gespring het.

“Hy het Jes, ons boerboel, wakker gemaak en ek het haar hoor blaf. Toe ons by die venster uitkyk, sien ons hoe hy oor die muur klim, maar toe hy grond vat, toe is Jes by hom,” het Gabrielson gesê.

Die man het probeer wegkom van Jes en sy het hom die swembad ingejaag. “Toe ek buite kom, sit sy op die rand van die swembad en knor vir die oortreder as hy beweeg. Toe ek haar roep toe spring hy uit die swembad en hardloop na ‘n muur tussen my en die bure.  Wat hy nie geweet het nie, was dat daar ‘n paar pitbulls aan die anderkant gewag het.  Hy het vinnig van plan verander en na my teruggedraai en met ‘n byl op my afgestorm.”

‘n Struweling het ontstaan en Gabrielson se vrou het intussen die  PWV Sekuriteit en  buurtwag gekontak vir hulp.

’n Beampte van  die sekuriteitsmaatskappy was binne oomblikke op die toneel, met die buurtwag kort op sy hakke. Die  oortreder is in hegtenis geneem. Verskeie  huisbraaktoerusting is in sy besit gevind.

Clive vertel: “Ek het aan die man gesê hy besef seker hy het nou by verkeerde plek probeer inbreek. ” Die oortreder is van betreding en besit van huisbraaktoerusting aangekla.

Vir die wat wonder, die held Jes het ‘n biefstuk of twee gekry as beloning!

Oorspronklike berig was geplaas op Kormorant


 

Leave a Reply