Die metroraad in Tshwane het met die ingenieursfirma GladAfrica ooreengekom om hul omstrede multimijoenrandkontrak te beëindig.

Stevens Mokgalapa, uitvoerende burgemeester van die Tshwane-metro, het dié aankondiging Maandag op ‘n mediakonferensie in Tshwane-huis in Pretoria gemaak.

Mokgalapa is vroeër die maand as die stad se nuwe burgemeester aangewys.

Die ouditeur-generaal het bevind dat die tender wat in November 2017 aan GladAfrica toegeken is, onreëlmatig was.

Hy het ook bevind dat die stadsbestuurder, dr. Moeketsi Mosola, met die toekenning van die tender die Wet op die Bestuur van Munisipale Finansies oortree het.

Werksaamhede tussen GladAfrica en die munisipaliteit sal op 30 Junie tot ‘n einde kom.

“Ons gee hulle kans om die werk waarvoor ons hulle reeds betaal het, klaar te maak,” sê Mokgalapa.

“GladAfrica was besorg oor hul reputasie wat weens die sage skade lei en was bereid om die kontrak te kanselleer. Daar is nie noodwendig iets fout met die werk wat GladAfrica doen nie, dit gaan eerder oor hoe die tender aangewys is.”

Die metroraad het reeds byna R500 miljoen op die GladAfrica-kontrak spandeer.

Die firma was onder meer daarvoor verantwoordelik om dienslewering te monitor. Mokgalapa het onderneem om al die aanbevelings van die ouditeur-generaal te implementeer.

Mosola word steeds deur die metroraad ondersoek.

Deur: Netwerk24
Hierdie berig weerspieël nie noodwendig die mening van SAUK-nuus nie.


Leave a Reply