ʼn Dreigement van “een koeël, een Amerikaner” is Donderdag buite die Amerikaanse ambassade in Pretoria gejil waar honderde betogers byeengekom het om kapsie te maak teen Amerikaanse buitelandse beleid in die Midde-Ooste.

“Die Amerikaners is die grootste terroriste ter wêreld. Hulle is verantwoordelik vir terreur in Kuba, Venezuela en talle ander lande in Suid-Amerika. Nou het hulle besluit die Midde-Ooste is hulle basis. Ons boodskap is dat daar geen tuiste vir julle is nie, anders gaan julle huis toe in kiste. Binnekort gaan julle die slagspreuk ‘een koeël, een Amerikaner’ hoor,” het Shuaib Booley, voorsitter van die Ahlul Bayt- Islamitiese Raad van Suid-Afrika onder luide toejuiging van die skare gesê.

Booley het die skare gelei in krete van “Allahu akbar” (God is groot) terwyl ambassade-werkers die betoging op ʼn afstand gade geslaan het. Amptenare het Booley later gestuit voordat hy die gebou kon binnegaan as deel van ʼn afvaardiging wat ʼn memorandum sou oorhandig.

Ook teenwoordig by die betoging was die sekretaris-generaal van die SAKP, Solly Mapaila, wat gesê het die party en sy alliansievennote gaan deelneem aan protesoptrede teen sogenaamde Amerikaanse inmenging in die streek.

“Die hele alliansiebeweging gaan ʼn reeks optredes hier by die Amerikaanse ambassade [in Pretoria] en by hul kantore in Durban, Kaapstad en Johannesburg reël.

“Ons gaan voort met die optrede totdat die VSA hom aan die Midde-Ooste onttrek. Hy moet sy hele mag onttrek,” het Mapaila gesê.

Polisielede het die situasie fyn dopgehou terwyl die skare, bestaande uit lede van die SAKP, ANC en ander, die Amerikaanse pres. Donald Trump gekritiseer het vir die dood van die Iranse generaal Kassem Soleimani. Soleimani is vroeër vandeesmaand in ʼn Amerikaanse hommeltuigaanval in Irak dood.

“Die Amerikaanse regering moet weet ons is ontevrede met sy destabilisering van lande wêreldwyd,” het Mapaila gesê.

“Ons staan Amerikaanse imperialisme teen. Ons staan Amerikaanse aggressie teen. Ons is ten gunste van menslikheid en dat almal in vrede moet leef. Ons sê nee vir oorlog, nee vir aanvalle, nee vir sanksies teen demokratiese state, waaronder die Islamitiese Staat van Iran.”

Clever Banganayi, adjunk- sekretaris-generaal van die Vriende van Kuba-vereniging, het ook gesê die VSA moet sy weermag uit die Midde-Ooste onttrek.

“Die VSA het soveel sanksies op die mense van Iran ingestel om chaos in die land te saai. Hulle soek olie [van Iran]. Dit is nie die eerste lande aan wie hulle dit doen nie. Hulle het dit in Latyns-Amerika, Venezuela en in Bolivië gedoen,” het Banganayi gesê.

Imam Seyyed Abdollah Hoseyni van die Islamitiese Sentrum vir Afrika, het ook sy organisasie se boodskap gelewer en het die skare gelei met krete van “dood vir Amerika”.

“Binnekort gaan julle die Midde-Ooste verlaat en ons gaan ons oorwinning vier. Die situasie gaan erger wees as wat dit nou is. Vat julle goed en gaan, of ons gaan julle huis toe stuur in kiste. Julle het Soleimani doodgemaak,” het Hoseyni gesê


Leave a Reply

This site uses Akismet to reduce spam. Learn how your comment data is processed.