Ontstoke passasiers by die Koedoespoort-treinstasie in Pretoria het twee treindrywers van die United National Transport Union (Untu) aangeval en die bestuurskajuite met klippe bestook.

Dit volg nadat Metrorail-treine Woensdagoggend vertraag was.

Luidens ’n verklaring deur Untu, het albei “ervare” treindrywers gevrees vir hul lewe en die lewe van die twee studente wat saam met hulle in die kajuit was.

“Die passasiers het groot klippe voor die trein gepak en die trein met klippe gegooi. Die glas en klippe het op ons neergestort,” sê Kgaripane Mogashoa (42) in die verklaring.

Sy het die treinbeheerbeampte gebel en is gemagtig om met die roete voort te gaan.

Mogashoa was op pad van Pienaarspoort na Pretoria, maar moes noodgedwonge by ’n rooi sein stop.

Volgens Mogashoa was die student wat saam met haar was, histeries.

Die trein het veilig by die Pretoria-treinstasie aangekom.

Mogashoa en die student ontvang berading.

Sy was ook die treindrywer wat twee jaar gelede in Centurion deur woedende passasiers aan die brand gesteek is.

Luidens die verklaring was Francois Herselman (53) op pad na Pretoria-Noord toe sy bestuurskajuit ook by die Koedoespoort-stasie met klippe bestook is.

Die venster is stukkend, maar hy is nie beseer nie.

“Passasiers het gedreig om my en die student dood te maak. Dit was aaklig,” het Herselman in die verklaring gesê.

Hy was ook die treindrywer van die trein wat passasiers ’n paar maande gelede by die Koedoespoort-stasie probeer kaap het.

“Passasiers is uiters gewelddadig teenoor treinbemanning die afgelope paar maande,” sê Herselman, ’n oupa van vier kleinkinders.

Steve Harris, hoofsekretaris van Untu, eis dat Prasa drastiese veiligheidsmaatreëls op al die spoorlyne implementeer – dieselfde maatreëls wat op die “berugte sentrale lyn” in Kaapstad geïmplementeer is.

“Ongelukkig het Prasa en die polisiediens toegelaat dat die spoorlyne ’n oorlogsone word. Drastiese, duur maatreëls word landwyd benodig om wet en orde terug te bring vir ons passasiers wat van spoorweë gebruik maak,” sê Harris.

Deur: Netwerk 24


Leave a Reply