“Dis jammer dat kinders weens die misdaadsituasie in ons land nie meer gewone dinge kan doen nie. ’n Mens is oral weerloos, maak nie saak hoe goed jy voorsorg tref nie.”

Dr. Danie Langner, hoofleier van die Voortrekkers, het Sondag só gereageer nadat ’n groep gr. 7-meisies Vrydagaand op ’n Voortrekkerkamp by die Voortrekkermonument in Pretoria aangeval is. Een van die offisiere wat by die meisies was, is van haar handsak en selfoon beroof en moes steke kry nadat die rower haar aangerand het. Die meisies van die Klapperkop-kommando is nie beseer nie, maar erg getraumatiseer.

Arden du Plessis (13) het vertel hoe iemand hulle tydens ’n nagwag omstreeks 23:00 vanuit die bosse met klippe bestook het. “Toe storm hy met ’n doringtak in sy hande uit die bosse. Hy het ons omgestamp.”

Die aanvaller het die een offisier platgeduik en haar begin slaan. “Daar was baie bloed,” sê Arden. Die rower het kort daarna gevlug, en die kinders het voertuie daar naby voorgekeer.

“Ons is geskok en ontsteld,” sê Langner. “Ons én die monument het alles menslik moontlik gedoen om die kinders te beveilig, maar toe verdwaal hulle tydens die nagmars (terwyl hulle items op die terrein moes soek). Hulle was omtrent ’n kilometer weg van die naaste kontrolepunt, buite die veilige gebied.”

Langner sê dis normaalweg baie veilig by die monument se kampterrein en op die nagwagroetes daar naby. “Ons kinders se veiligheid is ons eerste prioriteit. 6 000 van ons voortrekkers het in April daar gekampeer en niks het gebeur nie. Hier was nog nooit voorvalle op of naby die kampeergebied nie, maar wel op die fietsroetes (verder weg).

“Ons het ook bykomende sekuriteit vir Vrydagaand se groep gereël. Offisiere en voertuie het tussen die verskillende kontrolepunte van die roetes gepatrolleer. Offisiere by die kinders was deurentyd in selfoonverbinding met mekaar. Toe hulle agterkom die een groep het verdwaal, het hulle dadelik na hulle begin soek. Voertuie is ook uitgestuur. Hulle was binne minute ná die aanval op die toneel.”

Die polisie het nie op ’n versoek om kommentaar gereageer nie.

Langer sê hulle sal beslis aanhou kampeer by die monument, maar koppe bymekaarsit met die monumentbestuur om voorvalle soos Vrydagaand s’n te voorkom. “Dis ’n wonderlike kultuurterrein.”

Cecilia Kruger, besturende direkteur van die monument, sê hulle bestee maandeliks R120 000 aan beveiliging. “Dis ons grootste uitgawe. Dis onmoontlik om die hele terrein van sowat 250 ha te beveilig. In die toekoms sal ons sorg dat ’n wag kinders altyd op die nagwagroetes vergesel.”

Kruger sê daar is snags wagte met honde by die piekniek- en kampeerterrein, ingangshek, monumentkantore en fort. “Hulle kan enige tyd ’n voertuig met gewapende wagte ontbied. Bedags patrolleer ’n wag op ’n perd ook ons 10 km-lange heining.”

Kruger sê hulle is voortdurend in gesprek met die Tswhane-munisipaliteit om die heining, wat deels aan ’n plakkerskamp grens, beter te beveilig. “Dit sal egter miljoene kos om dit oral met palissade te vervang.”

Die polisie het nie op ’n versoek om kommentaar gereageer nie.

Die monument het Saterdagoggend laat wéér onder ’n rooftog deurgeloop. Volgens Kruger het vier mense wat met pistole en rewolwers gewapen was, wagte by die ingangshek aangehou, die kassiere van ’n bedrag kontant beroof en haar gedwing om die kluis oop te sluit. Hulle het daarna in ’n Volkswagen Golf weggejaag en is nog op vrye voet.

Deur: Netwerk 24


Leave a Reply