“Mag Afrikanerjeug dan nie deelneem aan demokrasie nie,” vra dr. Danie Langner, leier van die Voortrekkers, nadat ’n groep Voortrekkers gevra is om ’n raadsvergadering in Pretoria te verlaat.

“Ons het onskuldig met goeie bedoelings na die raadsvergadering gegaan . . . Hoekom mag hulle nie blootstelling kry nie? Ons wil ons jeug juis aan demokratiese prosesse blootstel sodat hulle kan sien hoe ’n demokrasie, ’n stadsraad en ’n parlement werk,” sê Langner.

Volgens hom is dit “baie jammer” dat die groep van 14 Voortrekkers wat almal in gr. 10 is, Donderdag gevra is om ’n Tshwane-metroraadsvergadering te verlaat.

“Ons is regtig teleurgesteld in die politieke partye in dié raad se reaksie. Wat is die boodskap wat hulle wou oordra? Dis ’n afbreek van sosiale kohesie en dui eintlik ook op ’n disfunksionele stadsraad.”

Die Voortrekkers het die speaker, Katlego Mathebe, vooraf skriftelik toestemming gevra om die vergadering te mag bywoon.

Mathebe het die versoek toegestaan, maar opposisiepartye in dié raad was baie ontevrede oor haar besluit.

Ons leer hulle om kultureel verdraagsaam te wees. Daar is wit, Indiërs en swart mense in dié land. Almal se kulture moet waardeer en gerespekteer word.

Mauritz Meiring

Benjamin Disoloane, leier van die EFF in die hoofstad, het dadelik kapsie teen die groep se teenwoordigheid gemaak.

“Ons het duidelike transformasie nodig. Dié kinders verteenwoordig dit nie.”

Nadat die een ná die ander raadslid van die EFF en ANC ook hul ontevredenheid oor die Voortrekkers uitgespreek het, het Solly Msimanga, uitvoerende burgemeester, die raadslede en speaker gevra dat die “onskuldige kinders” nie aan die bakleiery in die raad blootgestel moet word nie.

Die ander partye in die raad het uiteindelik hul sin gekry en die Voortrekker-groep is gevra om die vergadering eers tydelik te verlaat en later heeltemal.

Langner sê die Voortrekkers raak nie by partypolitieke kwessies betrokke nie.

“Politiek het tog ’n invloed op kulturele organisasies. Een van die Voortrekkers se waardes is positiewe leierskap.”

Volgens hom is hy deur verskeie politieke partye, waaronder ook Nathi Mthethwa, minister van kuns en kultuur, gevra: “Waar is die Afrikaner-kinders. Ons sien hulle nêrens nie”.

Mauritz Meiring, wat dié betrokke groep Voortrekkers as spanoffisier na die vergadering vergesel het, sê die einste groep het om dié rede ook ’n ruk gelede die konstitusionele hof besoek.

“Ons leer hulle om kultureel verdraagsaam te wees. Daar is wit, Indiërs en swart mense in dié land. Almal se kulture moet waardeer en gerespekteer word. Voortrekkers word geleer wat goeie burgerreg is. Wat gebeur het, is kulturele onverdraagsaamheid. Daar sit ’n klomp oningeligte raadslede in dié stadsraad.”

Langner sê al was die voorval hoe betreurenswaardig, gaan dit die kinders dalk bedag maak op wat hulle eendag op universiteitskampusse kan teëkom.


Leave a Reply

This site uses Akismet to reduce spam. Learn how your comment data is processed.